وزن میں کمی کے لئے کھانے میں پہلے سبزی اورگوشت کھانا چاہئے،تحقیق

دستر خوان پر جہاں مختلف قسم کے کھانے ہو تے ہیں وہیں چاول اور روٹی سب سے زیادہ پسند کی جاتی ہے لیکن تحقیق کے مطابق کھانے میں سب سے پہلے سبزی اور گوشت کھانا صحت کے لیے بہترہوتا ہے۔

سائنسی جریدے جرنل ڈائی بیٹیس کیئر میں شائع تحقیق کے مطابق کھانے کا آغازسبزی اورمرغی کے ساتھ کیا جائے اور بعد میں روٹی یا چاول کھائے جائیں تو اس سے ناصرف  اچھی صحت بر قرار رکھی جاسکتی ہے بلکہ وزن کو بھی کم کیا جاسکتا ہے کیونکہ کھانا روٹی یا چاول کے بجائے سبزی اور مرغی سے شروع کرنے سے پیٹ زیادہ دیرتک بھرا رہتا ہے۔ تحقیق کے لیے محققین نے کھانے سے قبل اور بعد شرکاء کے خون کی معائنہ کیا، جس میں پتہ لگا کہ وہ شرکا جنہوں نے سبزی اور پروٹین کےساتھ کھانا کھانا شروع کیا تھا ان کے خون میں کھانے شروع کرنے کے 30 منٹ بعد تک گلوکوز کی سطح 29 فیصد کم تھی۔نیویارک کی وائل کارنیل یونیورسٹی سے منسلک پروفیسرڈاکٹرلوئیس ارون نے نتائج کو تحقیق کی دنیا میں ایک قابل ذکر پیش رفت قراردیتے ہوئے کہا کہ نتائج سے ممکنہ طورپرلوگوں کو فائدہ پہنچ سکتا ہے کیونکہ نتائج سے یہ بھی ظاہرہوا کہ اس طرح پسندیدہ کھانوں کو بھی اپنی خوراک کا حصہ بنایا جا سکتا ہے جنہیں کھانے کے اختتام میں شامل کیا جائے۔